وان كان على قلبى اللى سكنتيه
انا هاقسى وهاعلن حرب عليه
وراح اقطع عنه النور والضى
سيطرتى على القلب بملكك
وبنيتى فى أرض ماهيش ملكك
وسكنتى القلب بوضع اليد
وانا قلبي ان يخرج من طوعى
ويروح مع حد ؟؟
راح ابلغ فيه
وهاجيبله إزالة بأمر الحى.
راح اهد المعبد على راسك .
وتدوقى المر اللى ف كاسك.
وانا هافضل سيدك تاج راسك.
من بكرة وجى .
وان كان على كم سنة من عمرى
ضاعوا معاكى.
يلا فداكى.
هايقولوا الجدع ال خسرتيه .
نقص من عمره وزكاكى.
وحش فى ملامحه وحلاكى.
رخص من تمنه وغلاكى.
واهو نفس الراجل دلوقتي.
مبسوط من نفسه إنه أذاكى.
واهو خلاكى.
بتقولى عليه أنه ملوش زى.
وان كان ع القلب ال سكنتيه
روحي اشبعى بيه
هايلف يلف ويرجعلى
وساعتها هالومه وآنب فيه
واتكلم وعليه يسمعلى
وهايفهم انك بتوطيه
وتدوسى عليه علشان تعلى
وساعتها هاشد السلخ عليه
وراح امنع عنه الزاد وال مى.
على فكرة كلامى اللى سمعتيه .
من ورا قلبى اللى انتى سكنتيه .
انا بس بناغش فيه شوية
علشان من كتر الحنية .
لاموا عليا
وعايرنى عليه الرايح والجى .
لكن انتى براحتك وبخاطرك.
انا جيت الدنيا عشان خاطرك .
رغم عذابك رغم مخاطرك .
تحلالى عشانك قولة أأأى .
تحلالى عشانك قولة أااى.
...... محمود دياب.......